Светските лидери денеска и утре на самитот на Г-20 во Бали
- Светските лидери денеска и утре се среќаваат на годишниот самит на Г-20 на индонезискиот остров Бали.
![Светските лидери денеска и утре на самитот на Г-20 во Бали](https://new.mia.mk/index.php/images/20221128061419_big_730x400_66.webp )
Бали, 15 ноември 2022 (МИА) - Светските лидери денеска и утре се среќаваат на годишниот самит на Г-20 на индонезискиот остров Бали.
Главната цел е да и се помогне на економијата да се опорави по коронавирусот, но тензиите околу војната во Украина би можеле да бидат попречувачки фактор, објави Би-Би-Си.
Г-20 е клуб на земји кои се состануваат за да разговараат за плановите за глобалната економија.
Земјите од Г-20 сочинуваат 85 отсто од светското економско производство и 75 отсто од светската трговија.
Во нив живеат две третини од светската популација.
Членки на Г-20 се Аргентина, Австралија, Бразил, Канада, Кина, Франција, Германија, Индија, Индонезија, Италија, Јапонија, Мексико, Русија, Саудиска Арабија, Јужна Африка, Јужна Кореја, Турција, Велика Британија, Соединетите Американски Држави и претставници на Европската унија, односно администрацијата во Брисел.
Шпанија е секогаш поканета како гостин.
Прашањата за кои дискутираат лидерите на Г-20 се движат од економија до климатски промени, одржлива енергија, меѓународно олеснување на долгот и оданочување на мултинационалните корпорации.
Секоја година, различна земја-членка на Г-20 го презема претседавањето и ја поставува агендата за состаноците.
Како претседавач во 2022 година, Индонезија сака самитот на Бали да се фокусира на глобалните здравствени мерки и постпандемиското економско закрепнување.
Исто така, сака да го промовира усвојувањето на стратегија за одржлива енергија.
Самитот е и можност лидерите на земјите да одржат билатерални средби.
Пред самитот, американскиот претседател Џо Бајден и кинескиот претседател Си Џинпинг одржаа тричасовен состанок во понеделникот и порачаа дека никогаш не треба да се води нуклеарна војна.
Тоа беше нивна прва средба откако Бајден стана претседател.
Бајден и Си истакнаа дека не може да има победници во нуклеарна војна и го нагласија своето противење на употребата или заканата од употреба на нуклеарно оружје во Украина.
Министерството за надворешни работи на Украина побара Русија да биде исклучена од Г-20 поради нејзината инвазија на Украина.
Индонезиската влада соопшти дека рускиот претседател Владимир Путин нема да присуствува на самитот, а руската делегација ќе ја предводи шефот на дипломатијата на таа земја Сергеј Лавров. паг/
![Г20 Индонезија (ЕПА)](/articles/images/d0b2d0b8d0b4d0bed0b4d0be-d0b3-20-d0bcd0bed180d0b0-d0b4d0b0-d0b1d0b8d0b/TfVUWGl99/placeholder.webp?use_watermark=0)
![бајден и си џинпин](/articles/images/d181d0b2d0b5d182d181d0bad0b8d182d0b5-d0bbd0b8d0b4d0b5d180d0b8-d0b4d0b5/FIEPBb6Cn/placeholder.webp?use_watermark=0)