Светска централна кујна и шпанскиот партнер ја прекинаа помошта за Газа по морски пат
- Шпанската невладина организација „Отворени раце“ (Open Arms) соопшти дека заедно со американската добротворна организација Светска централна кујна (WCK) ја прекина испораката на помош за Газа по море, откако седум хуманитарни работници беа убиени во израелски воздушен напад во понеделникот.
![Светска централна кујна и шпанскиот партнер ја прекинаа помошта за Газа по морски пат](https://new.mia.mk/index.php/images/20240405072526_big_730x400_40.webp )
Мадрид, 5 април 2024 (МИА) - Шпанската невладина организација „Отворени раце“ (Open Arms) соопшти дека заедно со американската добротворна организација Светска централна кујна (WCK) ја прекина испораката на помош за Газа по море, откако седум хуманитарни работници беа убиени во израелски воздушен напад во понеделникот.
Двете организации работеа заедно за да започнат поморски коридор со хуманитарна помош за Газа од Кипар во март и завршија со истоварот на околу една третина од испорачаната стока кога конвојот работници на WCK беше нападнат на 1 април.
„Овој напад, извршен од израелските одбранбени сили минатиот понеделник, означува болна пресвртница во нашите напори за ублажување на хуманитарната криза во Газа“, се вели во соопштението на „Отворени раце“.
WCK објави дека ги паузира своите активности во Газа, каде што отвори повеќе од 60 народни кујни од октомври. ОН проценуваат дека гладот е непосредна закана за повеќе од половина од населението во Газа.
Во средата, околу 240 тони храна беа вратени на Кипар во бродски конвој на „Отворени раце“, откако операцијата за истовар беше прекината поради израелски воздушен напад врз работниците.
„Со вчерашното враќање на бродот 'Отворени раце' во Ларнака, Кипар, мисијата во соработка со WCK на хуманитарниот коридор за Појасот Газа е прекината“, се вели во соопштението на „Отворени раце“. паг/
Фото: МИА архива