Тел Авив, 3 декември 2024 (МИА) - Сведочењето на израелскиот премиер Бенјамин Нетанјаху во судскиот процес за корупција против него ќе почне следниот вторник, на 10 декември, во зградата на Окружниот суд во Тел Авив, соопшти денеска судот.

Судската администрација претходно соопшти дека сведочењето на Нетанјаху ќе биде преместено од Ерусалим во Тел Авив заради неговата безбедност по заканите.

Администрацијата нагласи дека овој потег следел по консултациите меѓу судовите и безбедносната агенција Шин Бет за заштита на Нетанјаху за време на неговото сведочење.

Нетанјаху ќе сведочи во случајот за корупција против него од утврдена подземна просторија во судот во Тел Авив, јави вчера израелската новинска агенција ТПС.

Процесот против на Нетанјаху за корупција се одржува во Окружниот суд во Ерусалим. Судската администрација соопшти дека Израелската агенција за безбедност (Шин Бет) доставила „строго доверливи“ информации за закани по животот на премиерот. Во соопштението се вели дека Окружниот суд во Ерусалим немал соодветни засолништа. Затоа, Нетанјаху ќе почне да сведочи од бункер во Тел Авив.

Премиерот се соочува со обвиненија за измама и примање мито што произлегуваат од три одделни полициски истраги. Нетанјаху ги негира сите обвинувања за погрешно постапување и смета дека судењето нема да му пречи на неговите јавни должности.

Во случајот, познат како „афера со подароци“, Нетанјаху и неговата сопруга Сара се обвинети дека прифатиле подароци од 200.000 долари од холивудскиот милијардер Арнон Милчан во замена да му помогнат да добие работна виза во САД, а смениле и некои даночни регулативи од кои тој има корист.

Во втората истрага, позната како „афера Једиот“, се наведува дека Нетанјаху му помогнал на издавачот на весникот „Једиот Ахронот“ со менување на прописите за дистрибуција на весници, од кои има корист издавачот. За возврат, Нетанјаху, кој во тоа време беше министер за комуникации, доби „позитивно покривање“ од весникот.

Третата истрага е „аферата Безек“, според која Нетанјаху, исто така, во својство на министер за комуникации, му дал регулаторни предности на телекомуникацискиот гигант Безек.

За возврат, мнозинскиот акционер на Безек, Шаул Елович, му обезбеди на Нетанјаху позитивно покривање на неговите активности на веб-страницата за вести Вала, чиј сопственик е Елович.

Досега, ниту еден актуелен премиер на Израел не е осуден во криминални случаи. Ехуд Олмерт поднесе оставка во 2008 година пред да биде обвинет за корупција. Олмерт на крајот беше осуден на 27 месеци затвор. јт/