САД и Кина во вторник ќе ги продолжат разговорите за борбата против фентанил
- САД и Кина во вторник ќе ги продолжат разговорите за поефикасна борба против производството на фентанил, синтетичка дрога која предизвикува хаос во САД и за која Вашингтон го обвинува Пекинг, соопшти денеска администрацијата на американскиот претседател Џо Бајден.
![САД и Кина во вторник ќе ги продолжат разговорите за борбата против фентанил](https://new.mia.mk/index.php/images/20240128182547_big_730x400_79.webp )
Вашингтон, 28 јануари 2024 (МИА) - САД и Кина во вторник ќе ги продолжат разговорите за поефикасна борба против производството на фентанил, синтетичка дрога која предизвикува хаос во САД и за која Вашингтон го обвинува Пекинг, соопшти денеска администрацијата на американскиот претседател Џо Бајден.
Разговорите, како дел од работната група за борба против наркотици, што ќе се одржат во Пекинг во вторник, следат по самитот на САД и Кина во ноември во Сан Франциско, за време на кој претседателите Бајден и Си Џинпинг го продолжија дијалогот по неколкугодишна стагнација.
Според неименувани американски претставници, кинескиот претседател се согласил да преземе „низа мерки за значително намалување на пратките“ на компонентите на фентанил од Кина, кои често минуваат низ Мексико и неговите нарко картели.
Американските власти соопштија дека билатералната соработка во борбата против наркотиците била прекината со години, но ситуацијата се променила по средбата меѓу Бајден и Си.
Околу 100.000 луѓе умираат годишно во САД од прекумерна употреба на фентанил, така што лекот е една од водечките причини за смрт кај населението помеѓу 18 и 49 години.
Борбата против овој синтетички опијат, многу посилен од хероинот, ќе биде една од темите на претседателската кампања во САД. паг/
Фото: МИА архива