Скопје, 31 јануари 2023 (МИА) – Претседателот на Ракометната федерација на Македонија, Живко Мукаетов, денес ја предаде донацијата на СОС Детско село собрана од хуманитарниот натпревар „Сите ѕвезди“ организиран на почетокот на месецот.

-Ви благодариме од срце! 460 деца и млади без родителска грижа растат во семејство благодарение на вас – пишува на врамениот дрес кој Ракометната федерација на Македонија го доби од организацијата „СОС Детско село“ по повод примо-предавањето на донацијата.

Вкупниот износ кој е собран од продажбата на билети за хуманитарниот ракометно музички спектакл одржан на 3 јануари 2023 година во организација на РФМ, изнесува 1,372,550 денари, која сума ќе биде донирана на организацијата „СОС Детско село“.

-Посебна благодарност во оваа насока, Македонската куќа на ракометот, би сакала да упати до: „Триглав Осигурување“, „Алкалоид“ АД Скопје, „Халк Банка“, „Пивара“, „Никоб“, „Македонската Телевизија“, „ТВ Телма“, „Проевент“ и „КЛС“; како и до сите македонски уметници, компании и индивидуалци кои сесрдно ја прифатија поканата за учество во настанот без авторски или друг вид на надоместоци. Ракометната Федерација на Македонија во оваа прилика би сакала посебно да се заблагодари на бројната публика во арената „Борис Трајковски“. Спектаклот „Сите Ѕвезди за СОС Детско село“ го славеше ракометот, го славеше спортот. Победи човечноста и хуманоста. Заедно покажавме дека македонската нација е хумана, а спортот има посебна моќ да нѐ вивне во височините и да ни пружи уникатна доза на среќа, објави РФМ.

Трошоците за реализација на настанот, беа покриeни од страна на РФМ и нејзините спонзори. зс/