Скопје, 7 ноември 2024 (МИА) - Премиерот Христијан Мицкоски вчера изјави дека не е проблемот дали да се оди на предвремени парламентарни избори, туку дали е потребно сега да се трошат пари за избори. На ист став се и од албанската коалиција „Влен“ која е дел од Владата, додека опозициските СДСМ и ДУИ се изјаснија дека се подготвени за предвремени избори.  

Премиерот Мицкоски во изјава за медиумите дадена вчера во Скопје рече дека ВМРО-ДПМНЕ е подготвено да оди на избори, но дека прашањето е дали е потребно да се потрошат дополнителни 10 милиони евра за избори, пари на граѓаните. Посочи дека во тој период  ќе застане системот, нема да се  испорачуваат реформи, за да, како што посочи, „уште еднаш СДСМ се соочи со уште еден голем пораз“.

- Овој пат мислам дека ќе биде поголем од тој што го имаа пред шест месеци. Или да избереме опција да работиме четири години и да ги засукаме ракавите за доброто на граѓаните. Јас би ја избрал втората опција. Затоа реков мандатот на оваа Влада на граѓаните што го доби е четири години. Дали сме подготвени? Утре да одиме, подготвени сме, нема тоа никаков проблем. Но, ние носиме одлуки што се во интерес на граѓаните, не во интерес на љубители на естрада, рече Мицкоски.

Според него, локалните избори што треба да се одржат следната година се можност партиите да видат каква доверба имаат кај граѓаните. На опозициските партии им порача програмски и кадровски да се освежат. 

Ист став имаат и од коалицијата „Вреди“. Оттаму не гледаат логика да се распишат предвремени избори кога има стабилна Влада со мнозинство до 78 пратеници и кога нема ниту некаков потрес или криза во Владата.

- Од 90-тите досега немало постабилна влада и немало поголемо мнозинство од ова - 78 и тоа расте и сигурно за кратко време ќе надмине и 80 што е две третини од Собрание. Тоа е доволен коментар. За државата и за граѓаните кога имаш мнозинство од 80 пратеници непотребно е да се размислува за предвремени избори, бидејќи тоа е само трошок за државата и губење време, изјави пред некој ден првиот вицепремиер и министер за животна средина Изет Меџити при посетата на депонијата Дрисла.

Од Движењето ЗНАМ, кое исто така е дел од владината коалиција, се изјаснија дека се подготвени за избори, доколку мнозинството одлучи дека треба да се оди на избори. Лидерот на Движењето ЗНАМ, Максим Димитриевски на телевизиско гостување рече дека доколку се случат предвремени парламентарни избори заедно со локалните, драстично ќе се намали бројот на пратеници од СДСМ во Собранието.  

Прашањето за предвремени парламентарни избори се отвори на првата собраниска седница посветена на пратенички прашања кога како одговор на лидерот на СДСМ Венко Филипче, премиерот Мицкоски рече дека може да одат на избори, но да не се покајат од СДСМ за тоа. 

- Ако сакате да одиме на избори, да се провериме. Заедно со локалните (избори), може да одиме. Ако сакате, одма сега да ја договориме работата. Но да не се удавите во длабокото, каде што ве носат, рече Мицкоски откако лидерот на СДСМ од собраниската говорница го повика да го врати мандатот.

- Рековте дека ќе го вратите мандатот ако некогаш кажете Северна. Ајде премиере еве сега шанса во Собранието да го вратите мандатот, рече Филипче.

По ова опозициската СДСМ изјави дека е подготвена да оди на избори и оти во секој следен циклус на избори ќе настапува многу организирано и поуспешно. 

- Нашата теренска анкета укажува дека 65 проценти од граѓаните не се задоволни од работата на Владата. Тоа значи дека двајца од тројца граѓани не се задоволни од економските политики, од падот на животниот, од нашиот европски пат. Исто така, тоа е и порака дека Влен и ЗНАМ очигледно имаат маргинализирана улога и практично преполовена поддршка, рече претседателот на СДСМ Венко Филипче на прес-конференција во понеделникот во Собранието.

Можноста за предвремени парламентарни избори ја прифатија и од Демократската унија за интеграција, а лидерот на партијата Али Ахмети на средба со граѓани во Куманово најави дека доколку изгуби, ќе се повлече од политиката. 

За предвремени парламентарни избори се и од Алијанса за Албанците на Зијадин Села. бак/дма/

Фото: МИА архива