Резников: Украина ќе инвестира 550 милиони долари во беспилотни летала
- Украинската армија ќе потроши речиси 550 милиони долари за беспилотни летала во 2023 година и за таа цел има потпишано 16 договори со локални производители, изјави министерот за одбрана Олекс
![Резников: Украина ќе инвестира 550 милиони долари во беспилотни летала](https://new.mia.mk/index.php/images/20230130182540_big_730x400_58.webp )
Киев, 30 јануари 2023 (МИА) – Украинската армија ќе потроши речиси 550 милиони долари за беспилотни летала во 2023 година и за таа цел има потпишано 16 договори со локални производители, изјави министерот за одбрана Олексеј Резников.
„Оваа година ќе ги зголемиме набавките на беспилотни летала за вооружените сили на Украина. За таа цел имаме намера да издвоиме околу 20 милијарди гривни (547,05 милиони долари)“, напиша Резников на Фејсбук.
Од почетокот на војната, и Украина и Русија користеа широк спектар на беспилотни летала за извидувачки и офанзивни цели. Киев доби значителни испораки на беспилотни летала од своите партнери, кои се движат од турскиот ракетно вооружен Bayraktar TB2 до норвешкиот извидувачки дрон Black Hornet, кој тежи помалку од 33 грама. Но, сега Украина исто така сака да го зголеми сопственото производство за да создаде своја „армија на беспилотни летала“, како што рекоа нејзини официјални лица. паг/