Регионален форум на земјите од Западен Балкан за изготвување Патоказ за борба против корупција и нелегални финансии
- Во Охрид во периодот од 21 до 23 јуни се одржува Регионален форум на земјите од Западен Балкан, чиј домаќин и соорганизатор е Министерството за внатрешни работи на Република Северна Македониј
![Регионален форум на земјите од Западен Балкан за изготвување Патоказ за борба против корупција и нелегални финансии](https://new.mia.mk/index.php/images/20221107132215_big_730x400_77.webp )
Скопје, 22 јуни 2021 (МИА) - Во Охрид во периодот од 21 до 23 јуни се одржува Регионален форум на земјите од Западен Балкан, чиј домаќин и соорганизатор е Министерството за внатрешни работи на Република Северна Македонија, заедно со Канцеларијата на Обединетите нации за дрога и криминал УНОДЦ.
Целта на настанот е изготвување и усогласување на Регионален патоказ за борба против корупција и нелегални финансии наменет за земјите од Западен Балкан во кој ќе бидат дефинирани приоритетите за борба против корупцијата и нелегалните финансии. Регионалниот форум се одржува и во заедничка координација и соработка со Канцеларијата на заменик претседателот на Владата задолжен за борба против корупција, криминал и одржлив развој.
Како што денеска соопштија од МВР, работниот дел од форумот го отворил помошник министерот за ЕУ и меѓународна соработка во МВР, Муамет Реџепи, кој изразил благодарност до Канцеларијата за дрога и криминал на Обединетите нации за несебичната поддршка, координацијата и реализацијата на овој состанок, како и до Обединетото Кралство на Велика Британија и Северна Ирска и Сојузна Република Германија, за помошта и во реализирањето на форумот, но и воопшто, во спроведувањето на агендата во областа на внатрешните работи, како дел од портфолиото на Берлинскиот процес и на Групата за преземени обврски од областа на безбедноста.
Тој посочил дека со финализирање на овој Патоказ подетално ќе се образложат целите и потребите на регионот за поуспешна борба против корупцијата и нелегалните финансии и ќе се олесни споделувањето на добрите практики во справувањето со овие предизвици.
Усвојувањето на Патоказот за борба против корупција и нелегални финансии, што е крајна цел на Регионалниот форум, е предвидено за 25 јуни, кога министрите и шефовите на делегации од Министерствата за правда и за внатрешни работи на земјите од Западен Балкан и формално ќе го одобрат овој документ. цр/скс/
![thumbnail_3](/articles/images/regionalen-forum-na-zem-ite-od-zapaden-balkan-za-izgotvuva-e-patokaz-z/81HA0zfZT/placeholder.webp?use_watermark=0)
![thumbnail_5](/articles/images/regionalen-forum-na-zem-ite-od-zapaden-balkan-za-izgotvuva-e-patokaz-z/IdR4LrW67/placeholder.webp?use_watermark=0)
![thumbnail_6](/articles/images/regionalen-forum-na-zem-ite-od-zapaden-balkan-za-izgotvuva-e-patokaz-z/ich42j6S8/placeholder.webp?use_watermark=0)
![7](/articles/images/regionalen-forum-na-zem-ite-od-zapaden-balkan-za-izgotvuva-e-patokaz-z/sHy2iB8nW/placeholder.webp?use_watermark=0)