Распишан конкурсот за најдобра необјавена поетска творба-„Антево слово 2024“
- Меѓународната поетска манифестација „Анџело Ла Векија“ („Il Parnaso – Concorso di Poesia – Premio Angelo La Vecchia“), во соработка со Здружението за развој на култура и заштита на културно наследство „Контекст - Струмица“ годинава по седми пат го распиша конкурсот за најдобра необјавена поетска творба „Антево слово“, специјална награда на фестивалот востановена во чест на великанот на македонската поезија Анте Поповски.
![Распишан конкурсот за најдобра необјавена поетска творба-„Антево слово 2024“](https://new.mia.mk/index.php/images/20240103120630_big_730x400_30.webp )
Струмица, 3 јануари 2024 (МИА) - Меѓународната поетска манифестација „Анџело Ла Векија“ („Il Parnaso – Concorso di Poesia – Premio Angelo La Vecchia“), во соработка со Здружението за развој на култура и заштита на културно наследство „Контекст - Струмица“ годинава по седми пат го распиша конкурсот за најдобра необјавена поетска творба „Антево слово“, специјална награда на фестивалот востановена во чест на великанот на македонската поезија Анте Поповски.
На конкурсот можат да учествуваат поети од Македонија кои ќе испратат една своја необјавена песна на e-mail адресата: antevoslovo@gmail.com на македонски и италијански или англиски јазик. Со учеството на овој конкурс истите конкурираат и за носечката награда на манифестацијата „Парнас – награда на Анџело Ла Векија“. Творбите може да се испраќаат до 1 март 2024 година.
Претставниците на манифестацијата велат дека конкурсот за поезија е создаден со цел да се прослави и овековечи, преку „возвишена поезија“ духот, душата, суштината и есенцијата на животот.
-Најмногу пријавени поети има од Италија, но меѓу учесниците има поети од цела Европа, Балканот и пошироко. Специјалната награда „Антево слово“ ќе ја координира интернационална жири-комисија со која ќе претседава поетот од Македонија Митко Гогов, поет и претставник на Здружение за развој на културата и заштита на културното наследство „Контекст - Струмица“. Специјалната награда „Антево слово“ официјално ќе се додели пролетта, 2024 година во Каникати, Сицилија, како дел од програмата на меѓународната поетска манифестација „Парнас – награда на Анџело Ла Векија“, информираат организаторите.
Сите пријавени учесници ќе имаат можност да влезат во конкуренција за двете награди, носечката награда „Анџело Ла Векија“, награда која е именувана по професор Анџело Ла Векија, познат во Сицилија и на територијата на Италија со неговата работа како поет, драмски писател, историчар и професор и специјалната награда „Антево слово“ која ќе се доделува во чест на Анте Поповски, познатиот македонски поет, есеист, препејувач и публицист. рт/
Фото: Организатори