Рама ја повтори поканата за соработка со Демократите, но иронизираше со мандатот на Бериша
- Албанскиот премиер и лидер на Социјалистичката партија, Еди Рама, ја повтори поканата до опозициската Демократска партија (ПД), за соработка и покрај, како што рече, нивната реторика и постап
![Рама ја повтори поканата за соработка со Демократите, но иронизираше со мандатот на Бериша](https://new.mia.mk/index.php/images/20221108151520_big_730x400_58.webp )
Тирана, 28 август 2021 (МИА) - Албанскиот премиер и лидер на Социјалистичката партија, Еди Рама, ја повтори поканата до опозициската Демократска партија (ПД), за соработка и покрај, како што рече, нивната реторика и постапки.
- Нашата рака за соработка за ПД ќе биде подадена безусловно без оглед на однесувањето, реториката или постапките на нашите ривали. Вербалниот конфликт повеќе не треба да биде клучниот збор на политичкиот и парламентарниот живот. Затоа ние нужно мора да се промениме во овој поглед, независно од нивното однесување, што ги доведе до јамата каде што паднаа. Многу лесно е да се каже, многу тешко е да се направи, истакна Рама.
Тој нагласи дека неговата партија нема да потпаѓа под провокации туку ќе работи, како и до сега само во интерес на албанските граѓани, иронично истакнувајќи оти „за жал, ПД ќе дојде во Собранието со расипан заб, кој нема храброст да го извади, ниту волја да го смири, ниту да се справи со него“.
Всушност тој алудираше на поранешниот претседател и поранешен премиер, Сали Бериша (77) , кој на изборите на 25 април освои пратенички мандат, а кој во САД е прогласен за „пресона нон грата“ заедно со семејство.
Поради тоа американската амбасадорка во Тирана Јури Ким од лидерот на демократите Љуљзим Баша, побара да го повлече Бериша од пратеничката група, но Бериша кажа дека нема намера да се повлече, а во меѓувреме поднесе тужба до Парискиот суд против американскиот државен секретар Ентони Блинкен за клевета.
Блинкен во мај годинава објави дека САД им забраниле на Бериша и неговото семејство влез во таа земја, наведувајќи го фактот дека САД официјално ги сметаат него и неговото семејство за корумпирани. вт/ми/