Тирана, 17 декември 2024 (МИА) – Албанскиот премиер Еди Рама им се заблагодари на земјите-членки на ЕУ на Третата Меѓувладина конференција во Брисел, по отворањето на преговорите за реформскиот кластер за надворешни односи.

Тој изрази посебна благодарност и за унгарското претседавање, велејќи дека тоа му дало енергија на интеграцискиот процес на земјите од Западен Балкан.

-Речиси два месеци по отворањето на преговорите со оваа навидум незапирлива брзина, можам да кажам дека сето ова се случува пред се благодарение на унгарското претседателство и неверојатната унгарска енергија, на министерот за надворешни работи, Сијарто, за да биде што појасно амбицијата да го поддржи проширувањето на ЕУ и да го приближи Западен Балкан до ЕУ, изјавил Рама, објави Ора њуз.

Според него ништо од ова не можело да се случи без целосната поддршка на земјите-членки, но, „морам да кажам дека денес имаме поцелосна и појасна слика за сработеното“.

-Албанија си ја реализира домашната задача и има цел да ги отвори преговорите со ЕУ во 2027 година. Во рамки на оваа декада Албанија има за цел да се интегрира во Европската унија, нагласил Рама.

Додал дека ова не бил лесен процес, притоа додавајќи дека „нам ни е јасно и свесни сме дека Европа не ја обединува само географијата, туку вредностите, демократијата, владеењето на правото, човековите права и безбедноста. вт/