Рама во посета на Велика Британија, во фокусот изградба на елитна спортска академија во Драч
- Албанскиот премиер Еди Рама денеска ќе замине во посета на Велика Британија.
![Рама во посета на Велика Британија, во фокусот изградба на елитна спортска академија во Драч](https://new.mia.mk/index.php/images/20230426150722_big_730x400_29.webp )
Тирана, 26 април 2023 (МИА) - Албанскиот премиер Еди Рама денеска ќе замине во посета на Велика Британија.
Според медиумите, посетата ќе биде фокусирана на спортот и потпишувањето на договорот со кој се предвидува изградба на една од најелитните спортски академии во Албанија, што Рама го најави пред неколку дена во Драч.
Албанскиот премиер тогаш изјави дека „се работи на договор да се донесе во Драч една од најелитните фудбалски академии на еден од најважните тимови во целиот свет".
Според албанските медиуми, станува збор за спортска академија на Манчестер Сити.
Во таа насока, се очекува албанската делегација за време на нивната посета да оствари средба и со претставници на фудбалскиот клуб Манчестер Сити.
Албанскиот премиер во Велика Британија ќе биде придружуван од министерката за образование, млади и спорт на Албанија Евис Куши, како и од градоначалничката на општина Драч, Емирјана Сако.
Спортските терени кои ќе бидат дадени на располагање на Академијата за фудбал се во близина на Универзитетот „Александар Моисиу" во Драч. вт/паг/
Фото: МИА архива