Работна група ќе изнаоѓа трајно и стратешко решение за катната гаража кај Собранието
Скопје, 10 септември 2024 (МИА) - Ќе се формира работна група за изнаоѓање трајни и стратешки решенија за катната гаража кај Собранието.
Во соопштението на прес-службата се посочува дека во Собранието е одржана средба со претставници на државните институции во врска со гаражата на првиот кат.
-Денес, во Собранието за првпат се одржа средба помеѓу претставници на државни институции кои разговараа за долгогодишното прашање за катната гаража пред Собранието. Иако Собранието нема директни надлежности во градежниот процес, презеде иницијатива во водењето на дискусиите за решавање на ова прашање, се наведува во соопштението од Собранието.
На денешната средба присуствувале претставници од Собранието, Владата, Општина Центар, Државниот правобранител, Бирото за јавна безбедност (БЈБ), АНГО ДООЕЛ и Министерството за транспорт.
- Сите страни постигнаа договор за формирање работна група, со цел да се најде трајно и стратешко решение. Оваа средба имаше за цел да обезбеди комуникација и да се обезбедат сите информации и состојби, со намера да се најде трајно решение кое ќе биде од корист и за јавноста и за Собранието. Ова прашање е од големо значење за Собранието и ние сме посветени да обезбедиме ефикасно решавање, се наведува во соопштението. ев/аа/
ФОТО: Архива
