Скопје, 11 јануари 2024 (МИА) - Реновирана операциона сала на Универзитетска клиника за ортопедски болести денеска е пуштена во употреба. Оваа операциона сала е во склоп на оперативниот блок кадешто има четири операциони сали.

Станува збор за целосно реновирање на првата операциона сала со помошни простории, соба за одмор и соба за премедикации на околу 150 квадратни метри. Вкупната вредност на инвестицијата е 15 милиони денари, обезбедени од Фондот за здравство и од донации. 

Министерот за здравство Фатмир Меџити, кој присуствуваше на настанот, рече дека на Клиниката за ортопедски болести годишно се изведуваат 1.600 операции, а со реновираната операциона сала ќе се прават и до 2.000 оперативни зафати на годишно ниво. Меџити нагласи дека оваа сала не била во употреба од 2017 година и со нејзиното реновирање сериозно се зајакнуваат капацитетите на установата.

- Оваа Клиника е пример за успешно менаџирање на јавно-здравствена установа. Пред три години комплетно беше реновирана Клиниката, а исто така се изведе и првата трансплантација на коска во државата. Пред еден месец, од Буџетот на Министерството набавивме нов артроскопски столб наменет за пациентите. Редовно се инвестира во нова опрема, импланти и се вложува во здравствените работници, рече Меџити. 

Премиерот Димитар Ковачевски нагласи дека  инвестициите и реформите во здравство се еден од најважните приоритети на Владата, посочувајќи дека и во време на најголемата здравствена и економска криза овој процес не застанал, а како резултат на тоа во изминатиот период биле пуштени во употреба голем број реновирани здравствени објекти.

- Сево ова претставува само еден мал сегмент на она што се прави во целиот систем на здравството и она што ќе се прави на оваа Клиникасо оглед на тоа што преостануваат уште три сали да бидат комплетно реновирани, дополнително и делот на КАРИЛ што ќе започне со комплетно реновирање. На тој начин ќе имаме многу посовремени услови на здравството што нашите пациенти го заслужуваат, рече Ковачевски. 

Медицинскиот директор на Клиниката, д-р Александар Трајановски рече дека она што се прави, се прави за пациентите и за подобра здравствена услуга. Тој нагласи дека пациенти со ортопедски проблеми генерално многу ретко одат во приватното здравство. бд/бак/

Фото: МИА, Министерство за здравство