Против Наваз Шариф поднесени обвиненија за бунт
- Пакистанската полиција денеска поднесе обвиненија за бунт против поранешниот премиер Наваз Шариф и членови на неговата партија неколку дена пред закажаните митинзи на опозицијата со цел урива
![Против Наваз Шариф поднесени обвиненија за бунт](https://new.mia.mk/index.php/images/20221104214920_big_730x400_58.webp )
Исламабад, 5 октомври 2020 (МИА) – Пакистанската полиција денеска поднесе обвиненија за бунт против поранешниот премиер Наваз Шариф и членови на неговата партија неколку дена пред закажаните митинзи на опозицијата со цел уривање на Владата.
Полицијата во источниот град Лахоре ги регистрираше обвиненијата против Шариф, неговата ќерка Маријам Наваз и повеќе од 40 други лидери на партијата Пакистанска муслиманска лига Наваз (ПМЛ-Н).
- Наваз Шариф, осудено лице, злоупотребува институции и ги провоцира масите да се побунат против армијата и Владата преку неговите говори од Лондон, соопшти полицијата.
Шариф исто така е обвинет за заговор против земјата и обид за оцрнување на Пакистан како „лажна држава“.
Шариф издржуваше затворска казна под обвинение за корупција, но на 70-годишниот поранешен лидер му беше одобрена кауција врз медицинска основа и минатиот ноември отпатува на итно лекување во Велика Британија.
- Обвиненијата за бунт не можат да го запрат движењето на опозицијата за обновување на демократијата во земјата, изјави портпаролот на ПМЛ-Н, Маријум Аурангзеб – кој исто така е обвинет.
Пакистанското демократско движење (ПДМ), алијанса на опозициски партии, планира низа митинзи и протести што ќе започнат овој месец, со цел уривање на Владата на премиерот Имран Кан. јт/