Промовиран 23 број на списанието „Велес“
- Во организација на Клубот на писатели „Коста Солев Рацин“ денеска во локалната библиотека „Гоце Делчев“ во Велес е промовиран 23 број на списанието „Велес“, книжевно списание кое излегува еднаш годишно веќе 20-тина години.
![Промовиран 23 број на списанието „Велес“](https://new.mia.mk/index.php/images/20230222210003_big_730x400_18.webp )
Велес, 22 февруари 2023 (МИА) - Во организација на Клубот на писатели „Коста Солев Рацин“ денеска во локалната библиотека „Гоце Делчев“ во Велес е промовиран 23 број на списанието „Велес“, книжевно списание кое излегува еднаш годишно веќе 20-тина години.
Како што појасни проф д-р Васил Тоциновски, главниот уредник и воедно промотор на книжевното списание, во него единствени теми се Велес и велешани, а автори потписници може да бидат од сите страни на светот.
- Ова списание се занимава со севкупната историја, традиција и континуитет на велешкото духовно и материјално богатство од најстари времиња па се до денес, појасни проф д-р Тоциновски.
Во овој број има статии за улогата на лозарите во македонското културно, политичко и национално движење, за дејноста на Пулевски како предлошка за влијанијата на лозарските движења во Македонија, за Петар Поп Арсов училишен бунтовник и револуционерен деец, за улогата на списанието „Лоза“ 1892-1894 во дебатите од крајот на 19 век за самобитноста на македонскиот литературен јазик, како и статија за Петар Поп Арсов како патеписец.
Во списанието има за дипломатската дејност на Андреја Петковиќ за која пишува проф д-р Васил Тоциновски, за конститутивните елементи на македонскиот национален идентитет, извадоци од книгата на Веле Алексоски „Вистината за Македонија“, за ликовната гаериска дејност и музичката инспирација за млади.
Во овој 23 број на списанието „Велес “ се наоѓа и текстот на пред година ипол починатиот велешки хроничар Љупчо Данов насловен „Тажната приказна за велешката Симит и Таан алва“ и уште многу други интересни текстови.
На денешната промоција млади ликовни уметници од ООУ „Блаже Конески“ цртаа на тема Велес.