Општина Куманово во средината на овој месец склучи договор со компанија по претходно објавен тендер за расчистување на диви депонии на територија на општината и чистење на речните корита на реките Којнарка, Липковка, Кумановка и Крива Река на територија на општина Куманово и диви депонии. На огласот, како што е наведено на електронскиот систем за јавни набавки, избрана е фирмата „Евроградба-инженеринг“ ДООЕЛ село Владиевци, општина Василево. Вредноста на склучениот договор е 3.974.299 денари со вклучен данок на додадена вредност. Екологистите пак сметаат дека има решение, кое не вклучува постојано трошење  ресурси на проблем кој се повторува. Тие претходно предложија да се формира специјална бригада која ќе оперира на подрачјето покрај речното корито, редовно изнесување на смет, неколку пати во неделата и поставување големи садови покрај течението на реката. Кумановци велат дека треба да се исчистат и коритата долж теченијата на реките и во другите делови од градот. Тие повикуваат на засилени контроли, суштинско применување на законските одредби и казни за несовесните граѓани кои фрлаат смет во речните корита. ам/хс/