Продолжува борбата со пожарите во Далмација, стотици пожарникари на терен
- Стотици пожарникари од цела Хрватска, голем број канадери и авиони за гаснење пожари и денеска се борат со пожарите во Далмација, а најтешко е кај Тучепи и Подгора каде што огнената стихија беснее уште од вторник навечер.
![Продолжува борбата со пожарите во Далмација, стотици пожарникари на терен](https://new.mia.mk/index.php/images/20240802193648_big_730x400_25.webp )
Сплит, 2 август 2024 (МИА) - Стотици пожарникари од цела Хрватска, голем број канадери и авиони за гаснење пожари и денеска се борат со пожарите во Далмација, а најтешко е кај Тучепи и Подгора каде што огнената стихија беснее уште од вторник навечер.
Овој пожар се прошири и на Паркот на природата Биоково, гори во Врсини кај Трогир, а состојбата околу Скрадин е значително подобра иако пожарот е сè уште активен. Пожарот кај Врсини на трогирското подрачје и понатаму е активен, изјави Горан Слатина, командир на Доброволното противпожарно друштво Марина.
- Огнот се шири, се приближи до куќите. Пожарникарите на теренот повремено добиваат помош од четири канадери, рече Слатина.
Гори во засеокот Јаиќи, а огнот брзо се шири кон Бристивица и Близна Горна. Пожарот го гасат околу 150 пожарникари со 40-тина возила од локалните доброволни противпожарни друштва, но и од други делови на Хрватска. Захваќени се трева, ниска вегетација, макија и борови на околу 600 хектари.
- Нашите екипи и денеска ја следат надчовечката борба на пожарникарите со пожарите, изјави за ХРТ Доминик Стриж од Тучепи.
Состојбата на теренот, додаде тој, е многу подобра отколку што беше. - Отворен пламен немаше до пред малку, огнот се активираше внатре во самиот пожарникарски терен, но рабовите се целосно изгасени и нема повеќе ни чадење, рече Стриж.
Според извештаите на ХРТ, во Дубравиците кај Скрадин отворен ogan има само на едно место во кањонот Крка. - Огнот влезе во националниот парк, а сега тоа подрачје се tretira од воздух. Се работи за непристапен терен. Од паркот порачуваат дека посетителите не се загрозени, односно дека паркот е отворен. На теренот има 120 пожарникари. Мештаните велат дека синоќа конечно спиеле, а покрај патот сега, заради безбедноста на сообраќајот, се отстрануваат изгорени дрвја. Покрај боровата шума настрадале и лозја, насади со маслинки и трајни насади. Локалното население бара прогласување на елементарна непогода, а причината за пожарот допрва треба да се утврди, пренесе ХРТ. ссм/
фото: ХРТ принтскрин