Анкара, 14 мај 2023 (МИА) – Актуелниот турски претседател Реџеп Тајип Ердоган освои 50,30 отсто од гласовите на денешните претседателски избори во Турција, јави агенцијата Анадолија според резултатите од обработени 82,54 проценти од изборниот материјал.

Опозицискиот кандидат Кемал Киличдароглу освои 43,91, а Синан Оган 5,31 проценти од гласовите. За Мухарем Инџе, кој во четвртокот се откажа од изборната трка, гласале 0,48 отсто од избирачите.

Според приватната новинска агенција Анка, преброени се 53,1 отсто од гласовите при што Киличдароглу освоил 67,25, Ердоган 31,02, Оган 1,47 и Инџе 0,26 проценти од гласовите.

Граѓаните на Турција денеска гласаа на редовни претседателски и парламентарни избори, избирајќи меѓу тројца претседателски кандидати, 24 политички партии и 151 независен кандидат за новиот состав на Големото национално собрание, кое има вкупно 600 пратенички места.

Право на глас на изборите имаа 64,11 милиони луѓе, а излезноста била 88,44 отсто. јт/