Охрид, 13 април 2023 (МИА) - Спиритуално чествување во духот на православното црковно пеење приреди Женскиот камерен хор „Света Злата Мегленска“ на синоќешниот концерт одржан во типичниот сакрален амбиент на црквата „Света Софија“ во Охрид.

Велигденскиот концерт „Воскресение твоје“ го организираше Националната установа „Охридско лето“, како дел од активностите за организирање содржини и настани со високи уметнички вредности надвор од вообичаениот фестивалски термин.

Како што се посочува во соопштението од „Охридско лето“, прекрасниот хорски ансамбл прозвучи со восхитувачка убавина, влевајќи мир, спокој, радост и возвишеност кај присутната публика токму поради занесното музицирање, префинетата естетика и исклучителниот сензибилитет на членовите на овој хорски ансамбл.

- Огромна благодарност до институцијата „Охридско лето“ што ја имавме таа чест да бидеме дел од програмските активности на фестивалот. Посебно ни е драго што го одржавме Велигденскиот концерт „Воскресение твоје“ пред охридскатата публика и пошироката јавност, воочи најголемиот празник на православните христијани. Големо е задоволството затоа што охридската публика ни е многу позната. Заедно го прославуваме Велигденскиот празник на пригоден начин. Репертоарот беше наменски, исклучиво црковна православна музика од домашни и светски автори, изјави креаторката на концертот, Летка Димовска-Полизова под чија диригентска палка се одржа овој настан.

Секое огласување на Женскиот камерен хор „Света Злата Мегленска“ е посебно доживување, особено што станува збор за ансамбл со високо европско и светско реноме на чии концертни сцени и меѓународни конкурси  се здобиле со многу награди и признанија.

Хорот е составен од 22 ангелски гласови, вљубенички на хорското камерно музицирање од кои повеќето се млади академски образовани музичари, студентки од Факултетот за музичка уметност во Скопје и од другите универзитети во земјава. Основач, диригент и уметнички раководител е академскиот музичар Летка Димовска Полизова. аб/сп/

Фото: Охридско лето