Скопје, 15 октомври 2022 (МИА) - Преговорите за членство во ЕУ ќе траат со години и сите треба да дадеме свој придонес, од Собранието кое има централно место во носењето на европското законодавство, преку Владата, Претседателот, локалната самоуправа, експертите од граѓанскиот сектор до медиумите. Ова е сериозен процес кој не трпи импровизации, порачаа од државниот врв за најновиот Извештај на ЕК за земјата, прв по отпочнувањето на преговорите. Претседателот на државата Стево Пендаровски смета дека најновиот извештај на ЕК за напредокот на државата, доаѓа во време на растечки евроскептицизам меѓу македонските граѓани поради забавените евроинтеграции, а преговорите се можност за намалување на тој евроскептицизам преку враќањето на Европската Унија на голема врата кај нас и во регионот. -Тоа може да се постигне само преку поголема видливост на Унијата со своите механизми, иницијативи, критики и структурни фондови. Граѓаните треба да ја чувствуваат Унијата, не како далечно, безлично бирократско тело, туку, како нивен сојузник во напорите за подобар живот, тука, во Северна Македонија, порача вчера Пендаровски на настанот „На европскиот пат: Нови реформи, нови можности!”. Преговорите за членство, смета шефот на државата, ќе бидат стабилизирачки фактор не само за нашата држава, туку и позитивен сигнал за целиот регион. За нивното продолжување ќе биде неопходен државен консензус за уставните измени и во тој потфат, вели, треба да влеземе плански и без брзање. Овој процес, според Пендаровски, треба да се одвива онолку време колку што ќе биде потребно за да не отвораме нови рани во ткивото на македонската нација. – Во преговорите ќе ни стане јасно дека интеграциите не се само добрососедските односи, туку станува збор за еден колосален потфат за трансформација на државата и општеството што ќе бара трпение од сите нас, но и откажувања во многу области од нашето живеење особено на оние кои се денес привилегирани по разни основи. Крајната цел е изградба на функционална правна држава со ефикасен судски систем, нагласи Пендаровски, порачувајќи дека преговорите за членство ќе траат со години и дека од сите нас ќе се бара напуштање на старите навики и испорачување на резултати. Во таа смисла, рече Пендаровски, сите треба да дадеме свој придонес, од Собранието кое има централно место во носењето на европското законодавство, преку Владата, претседателот, локалната самоуправа, експертите од граѓанскиот сектор до медиумите. – Ова е сериозен процес кој не трпи импровизации. Секој наш чекор, освен Брисел, ќе го следи и најдобриот судија – македонската јавност. Секоја злоупотреба на овој процес за теснопартиски или лични интереси ќе значи губење на скапоцено време, кое го немаме, но, што е уште поважно, ќе значи дополнително губење на и така ниската доверба на граѓаните во државните институции. А, држава во која граѓаните немаат доверба сигурно не е држава во која тие ќе сакаат да живеат, порача Пендаровски. Премиерот Димитар Ковачевски во своето обраќање на настанот посветен на Извештајот на ЕК: „На Европскиот пат: нови реформи, нови можности” истакна дека Извештајот за нас е јасна верификација дека сме на добар пат и уште појасна насока каде треба да чекориме. -Има многу работи коишто треба да ги поправиме. Не е доволно само да се направи закон, да се изгласа закон, туку тој закон треба да се спроведе. Затоа ги повикувам сите институции, особено институциите коишто се во делот на владеењето на правото, што се во делот на борбата и справувањето со криминалот и корупцијата да ги засукаат ракавите и со забрзано темпо да работат на спроведување на се она што е нотирано во Извештајот, рече Ковачевски. Овој Извештај, како ниту еден до сега, нагласи тој, праќа и многу јасни пораки. Првата дека во државата постојат два концепти - едниот на чие чело е тој и во кој македонските граѓани, со крената глава, со дигнитет треба да чекорат кон ЕУ и да седат на големата маса во Брисел и вториот што е нотиран во овој Извештај - концептот на блокади, на седење на мала изолирана маса. – Еден концепт на чие чело сум јас, што предлага реформски закони, што предлага мерки за заштита на стандардот на граѓаните, што деноноќно работи на обезбедување на енергија, топлинска енергија, ресурси за производство на енергија. Втор концепт, со тоа што ги блокира две години сите закони во Собранието. Ако можам да го разберам еден дел од таа опозиција која што цел ден е на телефон со Русија, вториот дел не можам да го разберам. И затоа ги повикувам сите во Собранието, да се обединиме заради иднината на оваа држава. Затоа што од нас што сме во пратеничките клупи, што сме во канцелариите во Владата, зависи колку брзо ќе се спроведат реформите, истакна Ковачевски. Тој изрази уверување дека до 2030 година нашата држава може да стане членка на ЕУ, бидејќи досега 45 проценти од нашето законодавство е усогласено со европското и повика на обединување со цел до 2030 година да ја видиме Северна Македонија како рамноправна членка на ЕУ. Според чешкиот амбасадор во земјава Јарослав Лудва, чија земја е актуелен претседавач со Унијата, реформите се во основата на овој процес и ако не ги спроведеме, не можеме да одиме напред на патот кон ЕУ. Тој нагласи дека земјава има суштинска потреба да продолжи со реформите. Вели дека тука има два важни елемента - еден од нив се реформите, а другиот е конструктивниот политички дијалог. Според Лудва, Северна Македонија досега добро напредува со реформите, но мора да го одржи тој чекор. -Како што ќе напредувате на патот кон ЕУ, така е потешко да имате натамошни блокади кон тој пат. Затоа е потребно пообрување на добрососедските односи, кои започнуваат од долу нагоре, од соработката меѓу невладиниот сектор, оцени тој. Лудва најави дека како Амбасада ќе организираат неколку конференции за Северна Македонија и добрососедските односи, особено за подобрување на дијалогот со Бугарија, заедно со чешката Амбасада во Софија.