Брисел, 6 март 2025 (МИА) – Високата претставничка на ЕУ за надворешни работи и безбедносна политика Каја Калас денеска во Брисел ќе биде домаќин на првиот Младински политички дијалог за надворешната политика на Европската Унија, кој е замислен како чекор кон обезбедување поинклузивен и младешки пристап кон активностите на блокот ширум светот. 

На настанот е предвидено учество на 25 млади на возраст од 19-30 години со различно потекло и од различни региони ширум светот и ЕУ.  

Станува збор за млади активисти во сферата на човековите права, глобална дипломатија, климатските прашања, градењето мир и решавањето конфликти, кои со Калас ќе разговараат за надворешно-политичките приоритети на Европската Унија. 

Како што соопшти Европската комисија, овој дијалог претставува одраз на посветеноста на ЕУ да работи со младите кон изградба на покохезивна, флексибилна и инклузивна глобална заедница, базирана на заедничките вредности на мирот, демократијата, човековите права и просперитетот.  

- Со вклучување на младите, Европската Унија презема проактивен чекор кон создавање иднина која ги одразува аспирациите и грижите на следната генерација, се наведува во најавата за Младинскиот дијалог. сп/

Фото: ЕЕАС