Скопје, 30 септември 2022 (МИА) - Пратеникот Халил Снопче, член на Делегацијата во Парламентарното собрание на ОБСЕ, ќе учествува во Мисијата на ПС на ОБСЕ за набљудување на парламентарните избори во Република Босна и Херцеговина, што ќе се одржат во недела, на 2 октомври годинава. -Мисијата на ПС на ОБСЕ се состои од парламентарци од земјите учеснички во ОБСЕ, кои се распоредени за набљудување на општите избори во главниот град Сараево, како и во другите  региони, информираат од собраниската прес-служба. Оттаму објаснуваат дека набљудувачите на ПС на ОБСЕ тесно соработуваат со колегите од Канцеларијата за демократски институции и човекови права на ОБСЕ (ОБСЕ/ОДИХР) и со Парламентарното собрание на Советот на Европа, ПС на НАТО и Европскиот парламент. Меѓународната мисија за набљудување на изборите во Босна вклучува над 180 набљудувачи. Парламентарното собрание на ОБСЕ го сочинуваат 323 парламентарци од 57 земји од Европа, Централна Азија и Северна Америка. Собранието обезбедува форум за парламентарна дипломатија, набљудување на избори и зацврстување на меѓународната соработка за исполнување на заложбите на ОБСЕ во врска политичките, безбедносните, економските прашања, прашањата за човековите права и животната средина. сх/дма/ Фото: МИА архива