„Празниците зближуваат“ во Куманово, годинава со садење зимзелени дрвја
- Ученици од паралелките на македонски и албански наставен јазик од средното кумановско училиште „Перо Наков“, денеска по повод Бадник и Божиќ, засадија зимзелени дрвја во дворовите на училишта
![„Празниците зближуваат“ во Куманово, годинава со садење зимзелени дрвја](https://new.mia.mk/index.php/images/20221105180222_big_730x400_70.webp )
Куманово, 6 декември 2021 (МИА) - Ученици од паралелките на македонски и албански наставен јазик од средното кумановско училиште „Перо Наков“, денеска по повод Бадник и Божиќ, засадија зимзелени дрвја во дворовите на училиштата. И годинава продолжи активноста од „Безбедни училишта“ која како идеја под мотото „Празниците зближуваат“ и предлог на учениците оваа година заеднички се одбележува по десетти пат, но поради пандемијата изостана заедничката трпеза.
Со заедничкото садење на дрвјата, учениците симболично порачаа дека соживот и пријателството треба да се негуваат и градат постојано, како што засадените дрвја треба да се негуваат, одгледуваат за да растат и се развиваат, а воедно придонесуваат за почист воздух и поздрава животна средина која е важна за сите.
- Активноста се спроведува во организација на училиштата и СВР Куманово, отсек за превенција, а има за цел меѓусебно запознавање, градење на доверба, почитување, воспоставување на комуникација и градење на довербата дека со сите различности секое дете е исто и проблемите и предизвиците се исти за сите, само заедно може подобро да се справиме со насилствата, злоупотребите, асоцијалното однесување и да создадеме безбедност и заштита за сите, пред сè за младите, истакнуваат надлежните од СВР Куманово кои учествуваа на настанот.
![празници зближуваат](/articles/images/praznicite-zblizhuvaat-vo-kumanovo-godinava-so-sade-e-zimzeleni-drv-a/nUNGpv1Hr/placeholder.webp?use_watermark=0)
Учениците заедно со полициски службеници на граѓаните им поделија заштитни маски, како потсетување дека без оглед кои сме, кога и каде сме треба да се заштиме.
И градоначалникот на Куманово, Максим Димитриевски присуствуваше на настанот укажувајќи на целта на оваа манифестација која го задржа својот континуитет во поинаква форма поради пандемијата.ам/фф/