По грешка на изведувачот, ослободени дрвјата на кејот „13 Ноември“
- Откако граѓаните и невладините организации забележаа дека се бетонирани неколку дрвја на кејот „13 Ноември“, екипи на Град Скопје веднаш ги ослободија дрвјата.
![По грешка на изведувачот, ослободени дрвјата на кејот „13 Ноември“](https://new.mia.mk/index.php/images/20221107141217_big_730x400_73.webp )
Скопје, 3 јули 2021 (МИА) - Откако граѓаните и невладините организации забележаа дека се бетонирани неколку дрвја на кејот „13 Ноември“, екипи на Град Скопје веднаш ги ослободија дрвјата.
Градските власти денеска соопштија дека дрвјата биле бетонирани по грешка на изведувачот. За ситуацијата веднаш реагираше и градоначалникот на Град Скопје Петре Шилегов, кој, како што се наведува, вчера беше присутен на терен и ја координираше работата на службите што беа задолжени за експресната интервенција при ослободувањето на дрвјата. Со ослободувањето, сите дрвја на кејот сега се целосно заштитени и нема да имаат последици при нивното растење и развивање.
Град Скопје изразува благодарност до граѓаните и невладините организации за алармантноста при грешката на изведувачот, што овозможи и брза реакција на градските служби во оваа ситуација. По налог на градоначалникот Шилегов, од страна на градскиот инспекторат беше направен и записник според кој изведувачот ќе биде казнет.
Со реконструкцијата на кејот „13 Ноември“ е опфатено целосно ново поплочување, патека за лицата со инвалидност, високо зеленило – дрворед, поставување клупи, смарт клупи, корпи за џебен отпад, нови жардиниери за дрворедот, канделабри, рефлектори за осветлување и нови бетонски и електрични столбови заради реализација на забраната за паркирање и движење по кејот. На новиот кеј ќе биде ослободено повеќе место за велосипедистите и пешаците преку целосно спречување на можноста за нелегално паркирање на овој простор и сериозно ограничување на протокот на возила. мд/сп/
![дрвја на кејот](/articles/images/po-greshka-na-izveduvachot-oslobodeni-drv-ata-na-ke-ot-13-noemvri/XAPiuN8Th/placeholder.webp?use_watermark=0)