Скопје, 28 јуни 2022 (МИА) - Во рамки на ноќното обележување на хоризонталната сигнализација, ЈП „Улици и патишта“ - Скопје информира дека почна и обележувањето на пешачките премини со ладна пластика на улиците и булеварите во населба Автокоманда.

Екипите на ова јавно претпријатие изминативе денови ги обележаа пешачките премини на булеварот „Александар Македонски“ на пешачкиот премин кај бензиската станица „Макпетрол“ и почнаа со бележење и на крстосницата на булеварот „Александар Македонски“ со улица „16-та македонска бригада“.

-Обележувањето на пешачките премини со ладна пластика ќе продолжи во текот на вечерните часови на истата крстосница, а бидејќи техниката за нанесување на бојата се изведува рачно и е поспецифична за разлика од обичната боја потребно е повеќе време за изведба. Употребата на ладната пластика на пешачките премини е поквалитетна и се нанесува во подебел слој и гарантира поголема трајност на бојата, се наведува во соопштението. По налог на Град Скопје и Секторот за сообраќај предвидено е со ваков квалитет на боја да бидат обележани улиците во „Мал ринг“ и „Голем ринг“, но моментално оваа боја да се користи при обележување на најфреквентните сообраќајници т.н црни точки во градот. мд/са/