Скопје, 12 февруари 2026 (МИА) – Во ОУ „Димо Хаџи Димов“ во Влае денеска беше поставен камен-темелник на училишна спортска сала, која се планира да се гради на површина од 1400 квадратни метри и да има капацитет за 400 гледачи. Ќе биде повеќенаменска, односно за различни спортови, и покрај за настава по физичко образование на учениците, за тренинзи ќе може да ја користат и спортските клубови од општина Карпош. 

На настанот беше премиерот Христијан Мицкоски кој изјави дека објектот добива физиономија откако е одблокирана процедурата за изградба.

-Беше заглавена изградбата и проектот самиот по себе, но еве гледате за колку кратко време, можеби недела до две, веќе почнува да се извишува. Тоа е добро затоа што е дел од образовниот процес, добро е што жителите на овој дел од градот ќе може да ја користат оваа спортска сала и најважно што учениците од ООУ „Димо Хаџи Димов“ ќе имаат современ спортски објект каде што ќе може да се натпреваруваат во кошарка, во ракомет и во други спортови. Геометријата на самиот проект одговара на барањата и потребите на врвните федерации и тоа  посебно треба да се истакне за овој проект, изјави Мицкоски додавајќи дека по успешно завршените подготвителни активности проектот е препуштен на компанијата изведувач. 

Министерката Весна Јаневска изјави дека новото раководство на Општина Карпош покажува дека образованието ќе му биде еден од приоритетите.

-МОН ќе продолжи да ги поддржува сите проекти – како од повикот на Владата за инфраструктурни промени во општините, така и со свои проекти. Така, во ова училиште „Димо Хаџи Димов“ во март ќе почне изградбата на уште седум училници заради одржување едносменска и целодневна настава. Заедно продолжуваме со градежната офанзива и уште едно училиште во општината – „Петар Поп Арсов“ ќе добие дополнителни училиници за да може да се спроведува едносменска и целодневна настава, посочи Јаневска. 

Соопшти дека во тек е реконструкцијата на 30 училишни спортски сали и дополнително 30 почнуваат да се градат во училиштата каде што е неопходно.

- Она што го ветивме пред изборите во сите општини, вклучувајќи ја и Општина Карпош, почнуваме сериозно да го исполнуваме, додаде министерката за образование и наука. 

Градоначалникот на Карпош, Сотир Лукровски, во изјава за медиумите нагласи дека поставуваат нови стандарди за да покажат дека Карпош „умее во инвестиците и прави сè за иднината, пред сè, на нашите најмали сограѓани“.

-Оваа спортска сала е алтернатива на улицата за младината. Децата ќе имаат современи услови за настава по физичко образование, а клубовите од општината добиваат можност да имаат тренинзи со кои ќе дојдат до врвни спортски резултати. Салата се гради по сите европски нормативи и според стандардите на меѓународните спортски федерации, изјави Лукровски. 

Градоначалникот посочи и дека општината има уште многу вакви проекти и се надева дека сите успешно и во рок ќе бидат завршени. хс/са/

Фото: Влада на Република Северна Македонија