Посетата на лидерите на ЕУ во Тирана ќе чини 450 илјади евра
Тирана, 23 ноември 2022 (МИА) - Посетата на лидерите на Европската унија на Тирана, на 6 декември, на Самитот ЕУ-Западен Балкан, ќе ја чини албанската држава 450.000 евра, јави АБЦњуз.
- Со одлука на владата се издвојуваат 450 илјади евра за покривање на трошоците за организацијата на „Самитот ЕУ-Западен Балкан", кој во декември ќе се одржи во Тирана. Како што е познато, „сметката“ на Самитот ЕУ-ЗБ ќе биде покриена од резервниот фонд на државниот буџет за 2022 година, јави АБЦњуз.
Телевизијата додава дека на 6 декември во Тирана ќе се сретнат лидерите на Европската унија и оние од регионот, додека неодамна на предлог на германскиот канцелар Олаф Шолц Албанија го добила претседавањето со Берлинскиот процес и организацијата на Самитот во Тирана.
Потсетува дека истиот ден опозицијата предводена од Сали Бериша најави одржување на масовен протест.
- Запрашан од новинарите по многуте критики на власта за изборот на овој датум, кога лидерите на ЕУ ќе „слетаат“ во Албанија, главниот демократ Сали Бериша рече дека целта е да им се покаже на лидерите на Унијата дека „Албанија е рангирана под Виетнам кога станува збор за стандардите на демократијата, наведува АБЦ њуз. вт/
