Полицијата во Хонгконг употреби водни топови против демонстранти и новинари
- Полицијата во Хонгконг денеска употреби водни топови за да растера помали групи демонстранти, а цел биле и новинари.
![Полицијата во Хонгконг употреби водни топови против демонстранти и новинари](https://new.mia.mk/index.php/images/20221104130811_big_730x400_44.webp )
Хонгконг, 1 јули 2020 (МИА) - Полицијата во Хонгконг денеска употреби водни топови за да растера помали групи демонстранти, а цел биле и новинари.
Биле уапсени 30 лица во протестите кои се одржуваат еден ден по усвојувањето на Законот за национална безбедност од страна на кинескиот Парламент, објави ДПА. Демонстрантите се собрале во трговскиот кварт на Хонгконг.
Голем број полициски сили се распоредени денеска низ улиците на градот по повод 23-годишнината од враќањето на некогашната британска колонија под управа на Кина. Кинеските власти првпат оваа година го забранија традиционалниот марш во Хонгконг по повод овој настан.
Парламентот во Пекинг вчера го усвои спорниот Закон за национална безбедност, со кој се казнуваат субверзивни активности, сецесии, тероризам и договарања со странски сили. Со овој закон кинеското правосудство ќе биде надлежно за „тешки“ кршења на безбедноста, а за таквите дела е предвидена доживотна затворска казна. гт/