Пожарот во Атина сè уште не е ставен под контрола - материјална штета и евакуирани жители
- Пожарот што попладнево избувна во подножјето на планината Имитос во Атина и брзо од една, се прошири кон друга населба во јужниот дел на градот, сè уште не е ставен под контрола, зголемен е б
![Пожарот во Атина сè уште не е ставен под контрола - материјална штета и евакуирани жители](https://new.mia.mk/index.php/images/20221113151415_big_730x400_2.webp )
Атина, 4 јуни 2022 (МИА) – Пожарот што попладнево избувна во подножјето на планината Имитос во Атина и брзо од една, се прошири кон друга населба во јужниот дел на градот, сè уште не е ставен под контрола, зголемен е бројот на пожарникари кои интервенираат и од копно и од воздух, а превентивно се евакуираат жители, децата сместено во Детските села СОС, како и Дом за стари лица, што се во близина на пожарот, јави дописничката на МИА од Атина.
Градоначалникот на Општината каде што е пожарот Григорис Константелос, говорејќи за грчката телевизија „Скај“ рече дека одлуката за евакуација е превентивна.
Според грчките медиуми, две повозрасни лица со проблеми со дишењето биле пренесени во болница и им била пружена прва помош, а изгорени се неколку куќи, иако сè уште не е позната големината на материјалната штета од пожарот.
Портпаролот на противпожарната служба на Грција Јанис Артопиос информираше дека во пожарот интервенираат 102 пожарникари со три пешадиски тима, 30 возила, шест авиони и пет хеликоптери, од кој еден за координација.
Додаде дека во Атина пристигнуваат пожарникари од Пелопонез, од западна и централна Грција, а помагаат и војската со еден хеликоптер, полицијата со 250 полицајци со 25 мотори и десет патролни возила, како и огромен број волонтери пожарникари, но и цистерни од општините.
Претпладнево преку бројот 112 за итни случаи, поради големиот пожар Министерството за климатска криза и цивилна заштита на Грција побара од жителите на атинската населба Ано Вулас во јужниот дел на градот да се евакуираат. ср/ми/