Лондон, 12 ноември 2024 (МИА) – Надбискупот од Кентербери, Џастин Велби, поднесе оставка, откако се соочи со зголемен притисок да се повлече откако минатата недела беше откриено дека не реагирал доволно ригорозно на извештаите за злоупотреба на деца поврзани со црквата.

Велби е духовен водач на Англиканската заедница, која има повеќе од 85 милиони членови во 165 земји.

- Откако побарав благословена дозвола од Неговото Височество Кралот, решив да се повлечам од функцијата архиепископ на Кентербери. Кога во 2013 година бев информиран и ми кажаа дека полицијата е информирана, погрешно верував дека ќе следи соодветно решение. Јасно е дека морам да преземам лична и институционална одговорност за долгиот и ретрауматизирачки период помеѓу 2013 и 2024 година, вели Велби во оставката.

- Моја должност е да ги исполнам моите уставни и црковни одговорности, затоа точниот датум на повлекување ќе биде одреден по прегледот на сите обврски, вклучително и оние во Англија и во рамките на Англиканската заедница. Се надевам дека оваа одлука покажува колку сериозно Англиската црква ја сфаќа потребата од промени и нашата длабока посветеност за создавање побезбедна црква. Додека се повлекувам, тоа го правам со тага за сите жртви и преживеани на злоставување. Последните денови повторно го разбудија моето долгогодишно и длабоко чувство на срам поради историските неуспеси на Англиската црква во заштитата. Речиси дванаесет години се борев да воведам подобрувања. Другите ќе проценат што е постигнато, додава Велби.

Тој нагласува дека во меѓувреме, ќе продолжи да се среќава со жртвите, како што ветил.

- Верувам дека повлекувањето е во најдобар интерес на Англиската црква, која длабоко ја сакам и ја имав честа да и служам. Се молам оваа одлука да укаже на љубовта што ја има Исус Христос за секој од нас. Затоа што, пред сè, мојата најдлабока посветеност е на личноста на Исус Христос, мојот Спасител и мојот Бог; На оној што ги носи гревовите и товарите на светот и надежта на секој човек, истакнува Велби.

Независна истрага покажа дека Велби (68) не ја известил полицијата дека доброволци физички и сексуално малтретирале момчиња во христијански летни кампови.

Некои членови на Синодот поднесоа петиција Велби да се повлече бидејќи „ја изгубил довербата кај своето свештенство“. Петицијата собра повеќе од 1.800 потписи.

Повиците за оставка на Велби се интензивираа од четвртокот, кога Црквата ги објави резултатите од истрагата за однесувањето на Џон Смит (1941-2018), кој во текот на пет децении сексуално, психички и физички малтретирал околу 30 момчиња и млади мажи во Велика Британија и 85 во Африка.

Во извештајот се заклучува дека Велби не го пријавил Смит кај властите во август 2013 година, кога бил информиран за злоставувањето, набргу откако станал надбискуп на Кентербери.

Велби пред неколку дена ја презеде одговорноста за тоа што не обезбедил тврдењата за злоупотреба да се сфатат посериозно, но прво рече дека нема да поднесе оставка.

Црковните службеници дознале за злоупотребата уште во 1982 година врз основа на внатрешна истрага за Смит. Потоа беше утврдено дека примателите на тој извештај „се ангажирале во активно прикривање“ за да спречат наодите да излезат на виделина.

Помеѓу 1984 и 2001 година, Смит живеел во Зимбабве, а потоа се преселил во Јужна Африка. Во двете земји, тој малтретирал момчиња и млади мажи се додека не умрел во август 2018 година.

Злоупотребата на Смит не беше објавена до истрагата во 2017 година од страна на британскиот телевизиски канал Канал 4, што ја поттикна полицијата во Хемпшир да почне истрага. Јужноафриканската полиција планирала да го испраша Смит и се подготвувала да го екстрадира, но тој починал. јт/

Фото: ЕПА