-Северна Македонија и Албанија ја споделуваат истата визија за Балканот, како регион кој мора да остане безбеден, стабилен и во мир. Најдобар одговор на нарушената безбедност на континентот со руската агресија врз Украина е продлабочувањето на меѓусебната соработка. Обновениот билатерален меморандум го овозможува токму тоа, бидејќи клучот кон успешна одбранбена соработка и целосна интероперабилност на двете сојузнички армии е заедничката обука, заедничките вежби, блиските контакти помеѓу војниците и развивањето пријателства, рече министерката Петровска.

Taa, како што соопшти Министерството за одбрана, посочи дека и припадниците на двете армии во континуитет имаат одлична соработка, факт кој се гледа и преку големиот број заеднички вежби и обуки, како вежбата „Swift Response“ оваа година и планираното заедничко учество во вежбата „Defender Europe 23“ која треба да се реализира следната година и која е дизајнирана да изгради подготвеност и интероперабилност во Алијансата и помеѓу НАТО и партнерските земји.

-Регионалната безбедност е приоритет за двете земји и ме радува што соработката и заедничкиот придонес кон регионалните безбедносни иницијативи се продлабочува. Нашата одбранбена и сојузничка соработка ја зацврстува безбедноста на Западен Балкан и испраќа уште една порака – местото на Албанија и Северна Македонија во ЕУ е заслужено, а брзата интеграција е суштинска за заедничката стабилност, безбедност и просперитет, истакна министерката. 

Министерот Пелеши, се наведува, изрази задоволство што и двете земји се силно посветени на меѓусебната соработка и што сето она што е планирано се реализира со одлично темпо.