Петмина морнари обвинети за објавување видео снимка од пад на американски борбен авион
Вашингтон, 21 февруари 2022 (МИА) - Американската морнарица обвини петмина морнари дека во јануари објавиле контроверзна видео снимка на која се гледа пад на американски борбен авион Ф-35.
Видеото го прикажува моментот кога скапиот авион се запалил и паднал во морето при неуспешното слетување на носачот на авиони.
„Истрагата за неовластено објавување видео од бродот е завршена“, изјави портпаролот на воздухопловните сили Зек Харел.
Инцидентот се случи на 24 јануари, кога авион на американската морнарица Ф-35Ц не успеа правилно да слета на палубата, по што падна во морето од носачот УСС Карл Винсон на неоткриена локација во Јужното Кинеско Море.
Шестмина морнари беа повредени, а пилотот успеа безбедно да се катапултира.
Портпаролот на морнарицата изјави за УСНИ Њус дека протекувањето на последната снимка е проблематично бидејќи станува збор за „државен документ објавен без соодветно чистење“, додека другите се третираат поинаку бидејќи се направени „со личен уред“.
Најновиот американски воен повеќенаменски ловец Ф-35, вреден околу 100 милиони долари, покажа голем број проблеми, вклучително и доцнење во развојот, пречекорувања на трошоците и дефекти на опремата, наведува порталот Геополитика. паг/
