Брисел, 17 септември 2024 (МИА) - Директорот на Канцеларијата за Косово и Метохија, Петар Петковиќ, изјави денеска во Брисел дека немало трилатерална средба со приштинските претставници бидејќи нивниот преговарач, Бесник Бислими,го одбил таквиот предлог, а делегацијата од Белград инсистирала на темите како што се Заедницата на српски општини -ЗСО, службите и прашањето за спроведување на договорот и презентирани мерки за заштита на српскиот народ.

-Трилатералната директна средба со приштинската страна не се одржа бидејќи господинот Бислими одби да се сретне со претставниците на Белград, затоа што инсистиравме на теми како што се ЗСО, службите и прашањето за спроведување, односно примената на договорот, изјави Петковиќ.

Тој по средбата со специјалниот претставник на ЕУ за дијалог, Мирослав Лајчак, во рамки на дијалогот меѓу Белград и Приштина, рече дека разговарале за целосно спроведување на сите претходно постигнати и договорени спогодби, како и за сеопфатните мерки што ги презентирал Александар Вучиќ за заштитата на српскиот народ на Косово и Метохија и процесот на заживување на дијалогот.

Петковиќ наведе дека српската страна во Брисел разговарала и за мостот на Ибар, поштенските услуги, енергетиката, телекомуникациите, исчезнатите лица и интегрираното управување со премините.

-Значи, на преговарачка маса беа многубројни теми. Јас како главен преговарач на Белград ги презентирав мерките на Владата на Република Србија за кои на прес-конференцијата зборуваше претседателот Александар Вучиќ, рече Петковиќ.

По средбите, тој пред новинарите изјави дека разговарале за мерките кои налагаат заживување на процесот на дијалог, што е очајно потребен „бидејќи сме убедени дека само преку дијалог можеме да најдеме компромисно решение за прашањето за Косово и Метохија“.сд/

фото:МИА архива