Скопје, 31 јануари 2022 (МИА) - Прашањата поврзани со членството на Северна Македонија во Европската Унија и тековниот дијалог со Бугарија, беше една од главните теми на денешната средба на претседателот Стево Пендаровски со специјален претставник на Обединетото Кралство за Западен Балкан,  сер Стјуарт Пич.

Пендаровски, како што соопшти неговиот Кабинет, го информираше Пич за напредокот на дијалогот помеѓу двете земји и во тој контекст, претседателот се заблагодари за интересот и поддршката на Велика Британија за македонско-бугарскиот дијалог. Шефот на државата потенцира дека надминувањето на блокадата за почеток на пристапните преговори со ЕУ ќе внесе дополнителна предвидливост и стабилност на Западниот Балкан. Претседателот изрази задоволство од посетата на специјалниот претставник Пич набрзо по неговото именување на функцијата во декември 2021 година, оценувајќи дека таа е потврда за посветеноста на Обединетото Кралство за одржување на стабилноста и просперитетот на регионот. Соговорниците разменија мислења и информации за актуелните состојби во земјава и регионот, како и можностите за соработка со Велика Британија за темите од заеднички интерес, поврзани со стабилноста и безбедноста, како и зајакнувањето на институциите во борбата против организираниот криминал и високата корупција. Пендаровски и Пич, меѓу другото, разговараа и за одличната билатерална соработка меѓу Северна Македонија и Обединетото Кралство и можностите за зајакнување на соработката меѓу двете држави и за обезбедување натамошна британска поддршка во повеќе области и форми. нд/сп/