Делчево, 16 октомври 2023 (МИА) – Важноста на редовните прегледи за ехо на дојка и мамографски прегледи со акцент на подобро ментално здравје, беа во фокусот на вечерашната трибина насловена „Зошто ни се потребни превентивни прегледи и улогата на менталното здравје“ што ја организираше Организацијата „Жена“ од Делчево.

Како што истакна Анита Цоневска, координатор на проектот, целта на настанот е сензибилизирање на жените од Општина Делчево за овие теми.

- Целни групи се сите жени од Општина Делчево, вклучително жените од руралните средини и од маргинализираните заедници. Во тој контекст, можам да ги најавам бесплатните ехо прегледи на дојка, кои ќе се реализираат во наредниот период, рече таа.

Поддршка за реализација на активноста, како што додаде координаторката, има од Француската амбасада од каде очекува понатамошна соработка.

- Очекуваме од денешната трибина првично да добиеме заклучоци и препораки кои што ќе бидат преточени во еден документ кој со сите забелешки и предлози ќе го адресираме до Министерството за здравство, додаде Цоневска.

Ирен Кетоф, Аташе за соработка при француската амбасада, истакна задоволство што за „Розовиот октомври“ е во посета на Делчево на покана на Организацијата „Жена“ која е една од 7-те организации кои се добитници на нивниот повик за проекти.

- Имаше 26 кандидатури и многу тежок натпревар од кои 12 беа во категоријата за Родова еднаквост. Активностите кои беа понудени од организација ,,Жена" се оние кои навистина нѐ убедија и кои што се надополнуваат една со друга. Денеска, она што е важно за спасување човечки животи е превенцијата и скринингот за рак на дојка. Во Франција секоја година има околу 49.000 нови случаи на рак на дојка, тоа е вториот вид на рак кој се јавува кај жените, доколку се открие во рана фаза би можел да се лекува кај 9 од 10 лица, рече Кетоф.

Даниела Такева од Комисијата за еднакви можности при Општина Делчево, која исто така имаше дискусија во рамки на настанот, посочи дека Комисијата работи посветено на темата за женското здравје, посебно нагласувајќи го значењето на раните прегледи, превентивните и редовните прегледи на дојка. 

- Во таа насока, знаете дека претходните години имавме иницијативи за прегледи за ехо на дојка во здравствениот дом кај нас што вроди со плод. Еве изразувам благодарност до докторката Андријана Илиевска Велковска која воведе такви екотермини за дојка и сега многу повеќе се јавуваат на прегледи. Особено ако се има предвид и фактот дека во здравствениот дом во Македонска Каменица функционира мамограф и на тој начин жената може полесно да дојде до превентивни преглед, рече Такева.

Посебно ја потенцираше темата за менталното здравје, односно психолошката поддршка на жените со дијагностициран канцер. 

- Ова е многу важен момент бидејќи тие жени се соочуваат со непозната работа, покрај третманите кои се тешки, оваа жена мора да има поддршка од семејството, но и семејството треба да има поддршка. Ова е еден круг, кој, се надевам еве со комисијата за еднакви можности и организацијата „Жена“ ќе најдат одговори и оваа психолошка поддршка на оперирани жени или жени на кои им е дијагностициран канцер на дојка ќе можат да најдат психолошка помош, а зошто да не се формира и некој Центар за психолошка помош на онколошките болни, дополни Такева.

Панелисти на денешната трибина беа специјалисти од Здравствениот Дом Делчево, Лилјана Тричкова, гинеколог, Андријана Илиевска, рентгенолог, Билјана Георгиевска, психијатар, Дејан Глинџарски специјалист за Гешталт метода.

Во рамки на настанот присуствуваа и еминентни здравствени работници од Делчево кои потенцираа дека мамографот во Македонска Каменица е еден од најдобрите во Европа, со голема ефикасност при раното откривање на рак на дојка.вс/ар

Фото/МИА