Скопје, 26 октомври 2023 (МИА) - Општина Центар соопшти дека целосно ја поддржува петицијата потпишана од група граѓани/родители чии деца учат во ОУ „Коле Неделковски“ во Општина Центар, со која, меѓу другото, се бара редовно полициско патролирање на локациите во општината каде се собираат младите и видеонадзор и контрола во и надвор од училиштата.

Како што соопшти Општина Центар, петицијата е „резултат на загриженоста на родителите за безбедноста на децата во реонот на Дебар Маало откога пред два месеца тие алармираа за насилство и девијантни однесувања од малолетници“.

Во петицијата, во која како родител се потпишал и градоначалникот на Центар Горан Герасимовски, се бара редовно полициско патролирање на локациите во општината каде се собираат младите, нивна едукација за препознавање на деликвентни појави и разни облици на насилство и педофилија, видеонадзор и контрола во и надвор од училиштата, како и измени на законите со цел да се формира комунална полиција во рамките на локалната самоуправа.

-Општина Центар е отворена за институционална соработка со цел да им се излезе во пресрет на граѓаните за безбедност на нивните деца, по алармот на родителите и по немилите настани кои се случија во реонот на Дебар Маало и округот на училиштето „Коле Неделковски“, соопшти Општина Центар.

Покрај до Општината, петицијата на родителите е доставена и до министерствата за внатрешни работи, за образование и наука, за труд и социјална политика и за локална самоуправа. хс/ цр

Фото: МИА архива