Општина Демир Хисар со нова туристичка понуда
- Општина Демир Хисар од денеска е збогатена со нова содржина на нејзината интернет страница, а тоа е Туристичка понуда во која се содржани туристичките потенцијали на територијата на општината.
![Општина Демир Хисар со нова туристичка понуда](https://new.mia.mk/index.php/images/20240311112005_big_730x400_65.webp )
Демир Хисар, 11 март 2024 (МИА) - Општина Демир Хисар од денеска е збогатена со нова содржина на нејзината интернет страница, а тоа е Туристичка понуда во која се содржани туристичките потенцијали на територијата на општината.
Од секторот за односи со јавност информираат дека потребата за промовирање и достапност до туристичките потенцијали на Демир Хисар е од поодамна, но конкретно е реализирана по препорака од Локалниот економско-социјален совет на Општина Демир Хисар и со поддршка на градоначалникот и Советот на Општина Демир Хисар.
-Повеќе пријатели на Демир Хисар со право реагираа дека не се достапни информациите за убавините на нашата општина, за особеностите на демирхисарското поднебје, за објектите за сместување, за рестораните и кафе баровите, за природните и антропогени ресурси, за верските објекти, за можноста за планинарски и велосипедски туризам и друго, едноставно за тоа како и зошто би го посетиле нашиот крај. Составен дел на понудата е манастирскиот туризам, информираа од тамошната локална самоуправа.
Со новата содржина на интернет страницата на општината, секој заинтересиран може да ги најде на едно место сите неопходни информации за посета и престој во Општина Демир Хисар. мт/сст/
Фото: Општина Демир Хисар