Скопје, 20 ноември 2020 (МИА) - По повод 20 ноември - Светскиот ден на детето, кој оваа година се одбележува под мотото „Вложувањето во нашата иднина значи вложување во нашите деца“, народниот правобранител потенцира дека овој ден треба да биде поттик за уште поголем интерес на надлежните органи за подобрување на состојбата со правата на детето, и за континуирани заложби и ативности за овозможување уживање на овие права, секој ден во годината, на начин како што налага Конвенцијата за правата на детето. - Несомнени се заложбите за подобрување на состојбата со правата на детето како на домашен, така и на меѓународен план. Но, фактот дека, не секое дете има непречен пристап до овие права дека голем број деца немаат основни услови за живот, оставени сами, на маргините на семејството, заедницата, општеството, без потребната грижа и внимание, укажува дека мораме попосветено да работиме во надминување на сиромаштијата и ризиците кои го попречуваат хармоничниот развој на личноста на детето. Правото на детето на еднаков третман, соодветен животен стандард, најдобриот интерес и нивното вклучување во донесувањето одлуки кои ги засегаат нив самите нѐ задолжува кон нив да се однесуваме со должно внимание обезбедувајќи услови за нивен натамошен просперитет, со однос и третман кон нив како активни субјекти и носители на права. Од кабинетот на Народниот правобранител посочуваат дека се свесни оти промените бараат време, но времето, како што велат, подразбира и нови генерации на деца кои ќе можат да ги уживаат благодетите од правата кои им се гарантирани. - Затоа, во контекст на мотото под кое се одбележува денешниот ден ќе укажам, доколку сакаме да обезбедиме стабилна, сигурна и просперитетна иднина за нашето општество, треба час поскоро да се осврнеме кон децата и обезбедувањето непречено остварување на правата на секое дете, без исклучок, а основните принципи - темелите на правата во Конвенцијата за правата на детето треба да бидат императив во нашето работење, велат од Народниот правобранител. Упатувајќи апел за заедничко дејствување за подигање на јавната свест за правата на детето, Омбудсманот укажува дека грижата и заштитата на децата е обврска на секој од нас и сите ние треба да придонесеме за нивен правилен психофизички развој, да ги воспитаме и образуваме во духот на толеранцијата и прифаќање на различностите, да ги научиме како да одбегнуваат конфликтни ситуации и да го изберат дијалогот како начин на решавање на проблемите, со што ќе придонесеме детето да биде подготвено да живее во духот на мирот, достоинството, толеранцијата, слободата, рамноправно и солидарно со другите. фф/сп/