Од пазарот се повлекуваат 20 тони небезбедно млеко „МИЛКАНО“
- Според АХВ, сите останати производи од овој бренд се безбедни, со исклучок на млекото со наведениот лот и рок на употреба, а небезбедното млеко ќе се врати кај производителот доколку надлежни
![Од пазарот се повлекуваат 20 тони небезбедно млеко „МИЛКАНО“](https://new.mia.mk/index.php/images/20221114023239_big_730x400_3.webp )
Скопје, 7 ноември 2022 (МИА) - Од малопродажба се повлекуваат 20 тони УХТ трајно млеко „МИЛКАНО“ 3,2 отсто, увезено од БиХ, поради утврдено присуство на афлатоксин М1 над максимално дозволените количини од 0,05 микрограми на килограм, согласно македонските прописи.
Агенцијата за храна и ветеринарство (АХВ) сооошти дека сите останати производи од овој бренд се безбедни, со исклучок на млекото со наведениот лот и рок на употреба.
Небезбедното млеко ќе се врати кај производителот доколку надлежните ветеринарни власти од БиХ го прифатат тоа. Во спротивно, ќе биде уништено на депонијата Дрисла.
Наредба за повлекување на небезбедниот производ од полиците е издадена и на операторот со храна, кој веќе ја информира јавноста за ова постапување.
-Потрошувачите кои имаат купено УХТ млеко од брендот „МИЛКАНО“ со сериски број/лот- LOT FD04, датум на производство 05.10.2022 и рок на употреба 04.03.2023, да не го употребуваат, туку да го вратат на местото каде што е купен. Врз основа на добиен позитивен резултат за присуство на афлатоксин М1 над максимално дозволени концентрации во млеко од брендот „МИЛКАНО“ увезено од Босна и Херцеговина, Агенцијата за храна и ветеринарство почна постапка за повлекување небезбеден производ од пазарот. Станува збор за резултат добиен во рамки на мониторинг програмата за безбедност на храната, која покрај редовните и вонредните контроли, Агенцијата ја спроведува секоја година, наведува АХВ
АХВ потсетува и дека секоја недоследност во однос на безбедноста на храната, граѓаните можат да ја пријават лично до Одделението за заштита на потрошувачите при АХВ, на бесплатната телефонска линија наменета за потрошувачите 0800 3 22 22, или електронски на info@fva.gov.mk. мч/са/