Од денеска електронски ќе се врши увид во Детален урбанистички план на Општина Куманово
Куманово, 1 септември 2020 (МИА) - На официјалниот сајт на општина Куманово kumanovo.gov.mk од денеска граѓаните по електронски пат ќе имаат увид во фактичната состојба на деталниот урбанистички план (ДУП) и градежните парцели во општината.
Како што информираат од општината, секој граѓанин кој ќе сака да види што е предвидено во неговата катастарска парцела ќе може тоа да го направи преку апликација.
-Апликацијата е поставена на сајтот на Општина Куманово, каде граѓаните ќе можат да се регистрираат како корисници и да си дадат точки на интерес. Во однос на тоа за што се заинтересирани, тие и ќе добиваат информации (пример дали за нивниот дел се работи некој детален урбанистички план, доколку се работи за тој дел се организира јавна анкета и презентација и тие ќе бидат известени на нивната е-маил адреса за да можат да бидат присутни). За подетално користење на апликацијата граѓаните може да видат на следниот линк (http://141.136.14.14/Account/Login)- наведуваат во објавата на општината.
Оваа е првичната верзија на апликацијата а понатаму, најавуваат од општината, ќе работат и на нејзино надоградување, со цел да биде што е можно подостапно за граѓаните.
Апликацијата е направена со средства од буџетот на Општина Куманово, а таканаречената „паметна електронска карта“ ја изработил економскиот оператор „ИНЦ системи“ од Скопје.ам/бт/
