Од австрискиот премиер се бара да реагира на изјавите на Орбан

Меѓународниот комитет на Аушвиц побара од австрискиот премиер Карл Нехамер да изрази незадоволство на средбата со унгарскиот премиер Виктор Орбан поради коментарите за „расно мешање и невкусн

Од Пандорка Арсовска-Гацова

14:50, 26 јули, 2022

Од австрискиот премиер се бара да реагира на изјавите на Орбан

Виена, 26 јули 2022 (МИА) - Меѓународниот комитет на Аушвиц побара од австрискиот премиер Карл Нехамер да изрази незадоволство на средбата со унгарскиот премиер Виктор Орбан поради коментарите за „расно мешање и невкусната шега за гасот и Германците“.

„Меѓународниот комитет на Аушвиц е шокиран и вознемирен од расистичките испади на Орбан и во врска со тоа очекува австрискиот премиер Карл Нехамер да му даде до знаење на гостинот од Унгарија како се перцепираат неговите расистички излети во минатото и иднината на Европа во рамките на Европската унија“, изјави потпретседателот на тоа тело Кристоф Хојбнер.

Нехамер во четврток треба да се сретне со унгарскиот премиер и е првиот од „европските колеги“ кој ќе има можност да реагира на говорот на Орбан одржан минатиот викенд.

„Европската унија мора да продолжи што е можно повеќе да се дистанцира од расистичкиот став на Орбан и да му покаже на светот дека Орбан нема иднина во Европа“, рече Хојбнер.

Според него, „зборовите на Орбан ги потсетуваат преживеаните од Холокаустот на мрачните времиња на изолација и прогонство“.

Во саботата, во романскиот град Баиле Туснад, Виктор Орбан пред своите поддржувачи зборуваше за „мешањето на расите“, укажувајќи на европските народи и „дојденците однадвор“. Во истиот говор Орбан ја поврза сегашната гасна криза со минатото на Германија, алудирајќи на Холокаустот и владеењето на националсоцијалистите. Австрискиот канцелар засега не ги коментираше изјавите на Орбан од минатиот викенд. Нехамер преку Твитер порача дека со нетрпение очекува да се сретне со Орбан и посочи на согласност со Унгарија кога станува збор за борбата против илегалната миграција. паг/