Брисел, 6 декември 2023 (МИА) - Европската комисија одобри исплата на 1,2 милијарди евра државна помош за реализација на „важен проект од заеднички европски интерес“ (ИПЦЕИ) за поддршка на истражување, развој и прво индустриско распоредување на напредни компјутерски технологии во облак во повеќе провајдери во Европа. 

Исплатата на средствата за проектот наречен „Инфраструктура и услуги во облак од следната генерација“ (ЦИС) од страна на седум земји членки на ЕУ - Франција, Германија, Унгарија, Италија, Холандија, Полска и Шпанија, е одобрена согласно Правилата за државна помош на Унијата. 

Според планот, седумте земји членки ќе обезбедат 1,2 милијарди евра во форма на јавно финансирање, а се очекува дополнително да се обезбедат уште 1,4 милијарди евра од приватни инвестиции.  

Во ЦИС се вклучени 19 компании, меѓу кои и мали и средни претпријатија, кои треба да реализираат 19 високо иновативни проекти. сп/

Фото: МИА Архива