Тетово, 13 јануари 2026 (МИА) - Националниот парк „Шар Планина“ информира дека во текот на 2026 година ќе почне продлабочена соработка со Македонското еколошко друштво (МЕД) насочена кон унапредување на постојниот мониторинг на балканскиот рис и популациите на дива коза на Шар Планина. Во текот на оваа година следењето и набљудувањето на овие диви животни установата ќе го прави со зголемен број видеокамери.

Благодарение на поддршката од проектот на ПОНТ набавени се дополнителни фотозамки, кои ќе бидат и понатаму користени за мониторинг на дивиот свет. Дополнително, во соработка со МЕД, поставени се фотозамки на повеќе локации на целиот масив на Шара со цел прибирање релевантни демографски податоци за балканскиот рис. Податоците за потврдената репродукција на рисот, женката со младенче регистрирана во 2025, ќе бидат вклучени во регионалната база на програмата за закрепнување на балканскиот рис, која од 2006 година ги евидентира сите релевантни наоди за Македонија, Албанија и Косово, информираат од Националниот парк „Шар Планина“.

Со оваа соработка, како што велат, дополнително се надградува системот за мониторинг, кој Националниот парк континуирано го спроведува веќе трета година.

Во 2024 година ренџерска служба на националниот парк Шар Планина со камера го лоцира рисот на местото Долна Лешница. На планините, пред сè, западниот дел од државата, се проценува дека има 40-ина единки. Присуството на рисот овие 20-ина години се евидентира со видеокамери поставени на десетици места во националните паркови Шар Планина, Маврово, Пелистер, но и на Илинска Планина, Јабланица, Галичица и во заштитеното подрачје Јасен. ас/сст/

фото НП Шар Планина