Скопје, 25 август 2023 (МИА) - Градоначалникот на Општина Гевгелија, Андон Сарамандов, во придружба на претседателот на ВМРО-ДПМНЕ, Христијан Мицкоски, го означи ставањето во функција на новиот водоснабдителен систем во населеното место Негорци кој бил приоритетно барање на ова населено место за време на последните локални избори.

- Покрај овој проект, во изминатиов период, во изминатите 3 месеци на територијата на цела општина, и во градот и во населените места беа реализирани или во тек се повеќе проекти. Пред дваесетина дена завршивме и со изградбата на новиот цевковод за населеното место Прдејци, и овде имаме нов водоснабдителен систем, кажа во изјава за медиумите градоначалникот Сарамандов. 

Тој информираше за завршените проекти досега и рече дека во наредниот период ќе се асфалтира и улицата „Кирил и Методиј“ во Гевгелија, улицата „Лазар Велков“ во Негорци и улица во Прдејци, а следната недела ќе продолжи со реконструкцијата на улици во Смоквица во Миравци и во Давидово.

- Исто така, пред три-четири дена завршивме и со изградбата на три детски игралишта во Богородица, во Негорци и во Прдејци, а завршивме и со партерното уредување пред црквата во Горничет, рече Сарамандов.

Мицкоски, пак, најави поддршка за финансирање проекти на општините што ќе значат поквалитетен живот на граѓаните. 

- Тука за Гевгелија ќе бидат предвидени околу 3 и пол милиони евра годишно, а тоа се некаде околу 14 милиони евра за проекти кои што ќе бидат финансирани и инвестирани од страна на централниот буџет, плус проектите кои што ќе бидат реализирани од локалниот буџет за еден четири годишен мандат, изјави Мицкоски. сх/лв/

Фото: ВМРО-ДПМНЕ