Вевчани, 12 декември 2024 (МИА) - Во ресторанот „Виа игнација“ во Вевчани викендов ќе се одржи вториот Новогодишен базар.

Целта на базарот, како што информира организаторот, Ефимија Угриноска Кукоска, е да го раздвижи и разубави општествово во кое живееме.

Програмата, според неа, почнува в сабота на пладне со активности за најмладите, а ќе продолжи во вечерните часови со настап на Охриската група „Билјана”.

- Најмладите, в сабота ќе имаат можност да бидат дел од работилници за изработка на новогодишни украси, сликање со Дедо Мраз, дружење со Мики маус, Пинк Пантер и др., како и штандови со чоколадо, лижавчиња, бомбони. Во недела детската програма ќе започне од 12 часот со детската театарска претстава „Зимска приказна“ на Интимен театар - Битола, а продолжуваме со настап на детските групи при балетското студио Бах од Струга и ДЈ Џејбитс, изјави Угриноска Кукоска.

За посетителите, додаде, ќе бидат изложени и ракотворби од локални производители на предмети и накит: Билјана Брило со накитот со суташ техника, Марија Маринова Поп Маркова со накит од бакар и месинг, Филип Малезан со накит од сребро и филигран, Ивана со накит од волна, како и познатите производители на кремови Пеце-Леска, Трек ми џемчињата од цитруси и Весна со најубавото лепче од кисело тесто.

Во рамките на настанот посетителите ќе имаат можност да уживаат во традиционалната храна и топли напитоци. сс/дма/

Фото: МИА/ плакат