Женева, 18 март 2025 (МИА) - Завршија пленарните разговори на делегациите кои учествуваа на денешниот неформален состанок за кипарското прашање, што се одржа во Палатата на народите во Женева, јавија кипарските медиуми.

Според информациите од средбата, за прв пат од последната рунда преговори за решавање на кипарското прашање во 2017 година, во Кран Монтана е забележан позитивен развој.

По средбата, генералниот секретар на ОН, Антонио Гутереш ја објави својата одлука да назначи личен претставник за подготовка на следните чекори за кипарското прашање. Генералниот секретар на ОН најави и дека на крајот на јули ќе биде организиран нов сличен неформален состанок.

Ова се први преговори од 2021 година. Во разговорите учествуваа кипарски лидери, како и претставници од силите гаранти Велика Британија, Грција и Турција.

Обединетите нации ги ублажија очекувањата за значителен напредок, наведувајќи дека целта на еднодневните неформални разговори е само да почнат конкретни преговори за решавање на поделбата на островот.

Островот е поделен на грчко-кипарски југ и помал турско-кипарски север по грчкиот пуч и турската воена интервенција во 1974 година. Само Турција го признава Северен Кипар како самостојна држава.

Тампон зоната меѓу двете страни долга 180 километри ја надгледуваат мировници на ОН. Никозија останува единствениот поделен главен град во светот.

Додека целиот Кипар стана членка на Европската унија во 2004 година, правото на ЕУ важи само во јужниот дел до можното повторно обединување.

Напорите поддржани од ОН, чија цел е да се стави крај на деценискиот конфликт на Кипар, се одвиваат постојано и со години, без да се покаже мал напредок.

Кипарските Грци и ОН се залагаат за повторно обединување, додека Турција и раководството на кипарските Турци се залагаат за решение со две држави. мс/

фото: ЕПА