Крива Паланка, 27 јануари 2024 (МИА) - Фондацијата „Бел идеал" од Франција ја овозможува третата бесплатна сесија на изучување француски јазик за основците 
од Крива Паланка, со цел поттикнување љубов кон франкофонијата, францускиот јазик и култура.

Досега интерес за бесплатни часови по француски јазик во градот пројавија педесетина ученици од четврто и петто одделение од основните училишта „Јоаким Крчовски“ и „Илинден“ Крива Паланка и редовно посетуваат часови што ги овозможи „Бел Идеал", на иницијатива на претседателката на Фондацијата, Јадранка Бојковска -Бенреждал.

- Со цел промоција и афирмација на француската култура и јазик што особено се истакнува во нашиот град низа години наназад, продолжуваат иницијативата и вложувањата на фондацијата што ги поддржува сите млади што имаат интерес за запознавање со француската култура и изучување на јазикот. Ова бесплатно изучување на јазикот преку неделни часови за над педесет ученици од четврто и петто одделение од основните училишта во мојот роден град, преку иновативни и интересни методи им отвора нови можности, видици и перспективи на овие млади личности, рече Бенреждал.

Отворени се три паралелки за сензибилизација во просториите на училиштето за странски јазици „Оксфорд".

- Во тек е повик за пријавување нови учесници во курсот, а часовите ги одржува мојата почитувана сограѓанка, искусната и докажана професорка по француски јазик, Елена Николовска, која е вистински амбасадор на францускиот јазик во градот и државата, која редовно е одговорна и за франкофонската вечер која го слави францускиот јазик, рече Бенреждал.

Иницијативата има поддршка од Француската амбасада во Северна Македонија, Францускиот институт во Скопје, но и од Општина Крива Паланка, професорите по француски јазик и директорите на училиштата.

Францускиот јазик е официјален јазик во Европската унија, а според професорката по француски јазик, Николовска, учениците учат и се задоволни што преку различни активности се запознаваат со францускиот јазик 

- Интересот за изучување на францускиот јазик се зголемува, а тоа е една од главните цели на овој проект на фондацијата, рече Николовска. ид/ев/