Тел Авив, 5 април 2023 (МИА) - Израелскиот премиер Бенјамин Нетанјаху изјави дека Израел работи на смирување на ситуацијата по денешниот судир меѓу полицијата и верниците во џамијата Ал Акса во Ерусалим.

„Израел е посветен на одржување на слободата на вероисповеста, слободниот пристап до сите религии и статус кво, и нема да дозволи насилните екстремисти да го променат тоа“, рече Нетанјаху.

Рано утринава израелската полиција нападна десетици верници во џамијата Ал Акса во Ерусалим, според изјавите на сведоците, палестинските власти и полициското соопштение.

Полицијата соопшти дека интервенцијата била одговор на претходните немири и дека биле принудени да влезат во комплексот откако маскирани екстремисти се заклучиле во џамијата со пиротехнички средства, стапови и камења.

Инцидентот предизвика протести во окупираниот Западен Брег, а израелската војска соопшти дека девет ракети биле истрелани од Газа кон Израел, откако сирените се активирале во јужните градови.

Тензиите во комплексот на џамијата Ал Акса, кој Евреите го нарекуваат Ридот на храмови, се придружени со насилство во последниве години. ссм/

фото: МИА архива