Битола, 21 март 2025 (МИА) - Професорките од Психолошкото советувалиште на УКЛО, д-р Драгана Батиќ и д-р Гордана Ристевска Димитровска, одржаа обука за интервенција во криза, фокусирана на колективна траума. 

Обуката беше наменета за психолози, педагози и социјални работници, кои работат во поддршка на луѓе во кризни ситуации, со акцент на помошта за деца, адолесценти и студентите.

Според професорката  Гордана Ристевска - Димитровска, потребно е да се обезбеди психосоцијална помош и да се создадат интервенции за да се помогне на засегнати од трагични настани, додека професорката Драгана Батиќ смета дека  трагичниот настан во Кочани  е колективна траума која ја засегнува целата заедница и дека е важно да се создаде поддршка меѓу стручните лица за да се превенираат понатамошни штети.

Психолошкото советувалиште на УКЛО е достапно за секој студент кој има потреба од помош и поддршка, беше посочено на денешниот едукативен настан во УКЛО- Битола. мт/ 

Фото: МИА